Partangiangan Manangianghon Boni di taon 2023

 

Tung mansai arga jala mansai ulido sada ulaon pangula, nangpe sipata adong jumpangna hangaluton di pardalanan ni ulaon nai, alai nangpe songoni dihamaolon na jumpang i, laos disi hita gabe marsitutu lao mangulahon ulaon i, huhut lao mangido pangurupion sian Tuhanta napajadihon akka suan-suananta i. Molo tapaihut-ihut do proses na tung mansai ganjang jala marragam, mulai sian namangula,manggole,marsuan,marbabo,mamuro sahat tu na gotilon, sada proses na tung mansai ganjang jala mamorluhon akka gogo dohot partikian. Alai nang pe songoni,na ikkon dalani on ta doi dinalao mangkirim sada hasil na dumenggan. Ala dang adong sihirimon molo so adong ni ula.

Partangiangan manangianghon boni sadarion, sada hasomalan na uli do on di hurianta GKPI Pakpahan, na godang ruas na mangula di hauma manang dibalian. Partangiangan manabur boni on dipatupa sadarion di ari Selasa 17 Oktober 2023 masuk pukul 19.30 WIB. 70 halak ro do di ulaon on na niuluhon ni amang pandita Resort Pdt.Maringan Hutagalung,dohot paragenda St Pansamotan Pakpahan,partangiang St Ramses Pakpahan. Laos diboan akka inanta be do eme nalaho gabe boni ,jala ima nalao sitangiang hononton di bodarion.

Pandita resort di jamita na pasahathon hata ni Debata na dienet sian Parjamita 11: 6 "Sogot manogotna i saburhon bonim jala unang patait tanganmu nang bodarina i, ai ndang diboto ho manang dia sian na dua i manjadi, manang tung rap duansa manjadi".

Parbueni ni ngolunta si ganup ari ,pangkataion,parrohaon nang parulaon ido gabe boni di ngolunta on. Di ganup akka talenta na dipasahat Tuhan tu hita,tama do hita manangianghon i mardongan pangkirimon  nauli,jala ikkon hamauliate honon ta ,manang songon dia pe rumang na. Ala sude nai manjadi dang ala ni gogo,manang ha malo on ta,tung holan ala ni asi ni roha ni Tuhan ta do. Attong dipargogoi Tuhan ima hita di ganup akka ulaonta. 

ASA MARDANGKA MA DANGKANA,MARRANTING MA RANTING NA,IA NUNGGA GABE TAON NA SALPU,UNGGABEAN MA DI TAON SONARI,ASA SINUR MA NA PINAHAN GABE NANIULA,MANGOMO ANGKA PARTIGA-TIGA,JALA HORAS NANG GANUP JOLMA RUAS NI GKPI PAKPAHAN.....